Exercendo de pontes da sociedade civil hondureña e agradecendo apoios

O pasado día 30 de xullo fixemos chegar a Pilar Romero, Subdirectora Xeral de Cooperación Exterior da Xunta de Galicia, a placa de agradecemento que o noso socio hondureño Alcaldía de Marcovia nos encomendara entregarlles como agradecemento ao seu apoio na financiación de diversos proxectos, neste caso concretamente do Proxecto de abastecemento e saneamento aos caseríos de Las Lajas e El Zapotillo no municipio de Marcovia que tivo lugar entre 2009 e 2010. Ademais de facer de transmisores deste agradecemento tanto da poboación participante destas aldeas como da propia alcaldía, aproveitamos para agradecer tamén en nome de ESF o aporte ao resto dos proxectos e insistir na importancia desta financiación descentralizada galega como mostra da vontade dos galegos de que a cooperación para o desenvolvemento siga sendo unha política pública en Galicia.

 Á esquerda Pilar Romero (Subdirectora Xeral de Cooperación Exterior) coa placa, no medio Jorge López (coordinador do Grupo de Programas Internacionais de Auga e Saneamento de ESF Galicia) e a dereita Chelo Revilla (Vogal de Voluntariado da Xunta Directiva de ESF)